Më 11 shtator 2001, bota u trondit nga një prej sulmeve më të rënda terroriste në histori. Dy Kullat Binjake të Qendrës Botërore të Tregtisë në Nju Jork u goditën nga aeroplanë të rrëmbyer, duke shkaktuar mijëra viktima dhe duke ndryshuar përgjithmonë rrjedhën e politikës dhe sigurisë globale.
Në orën 08:46 të mëngjesit, një avion pasagjerësh i rrëmbyer nga terroristët e Al Qaeda-s u përplas me Kullën Veriore. Vetëm 17 minuta më vonë, një avion tjetër goditi Kullën Jugore, duke krijuar skena apokaliptike që u transmetuan drejtpërdrejt në të gjithë botën.
Në total, 2.752 persona humbën jetën në sulmin ndaj Kullave Binjake, mes tyre 343 zjarrfikës dhe 60 policë, ndërsa viktimat i përkisnin 70 kombësive të ndryshme.
Pak orë më vonë, një avion tjetër u përplas mbi Pentagon, ndërtesën qendrore të mbrojtjes amerikane në Uashington, duke shkaktuar dhjetëra viktima të tjera. Ndërkohë, një aeroplan i katërt u rrëzua në Pensilvani, pasi pasagjerët tentuan të merrnin kontrollin mbi terroristët.
Presidenti i asaj kohe, George W. Bush, shpalli se Amerika ishte nën sulm terrorist. Për herë të parë në historinë amerikane, Administrata Federale e Aviacionit pezulloi të gjitha fluturimet në territorin e SHBA-së.
Pas sulmeve, Shtetet e Bashkuara nisën një ofensivë të madhe ushtarake në Afganistan, duke rrëzuar regjimin taleban që mbështeste Al Qaedën.
Sot, 24 vite më vonë, në vendin ku dikur ngriheshin Kullat Binjake, qëndron Kulla e Lirisë (Freedom Tower), si simbol i qëndresës dhe kujtesës për viktimat e 11 shtatorit.
