Autoritetet polake kanë mbyllur Aeroportin Ndërkombëtar të Varshavës dhe avionët polakë e të NATO-s janë ngritur në ajër pasi janë shfaqur raportime për dronë rusë mbi vendin.
Komanda Operative e ushtrisë polake tha në një deklaratë se “sistemet tokësore të mbrojtjes ajrore dhe të zbulimit me radar kanë arritur nivelin më të lartë të alarmit” pasi Rusia nisi sulme të mëdha ajrore mbi territorin ukrainas.
“Për të garantuar sigurinë e hapësirës ajrore polake, Komandanti Operativ i Forcave të Armatosura Polake ka aktivizuar të gjitha procedurat e nevojshme,” thuhet në deklaratë, duke shtuar se ushtria polake është “plotësisht e përgatitur për një përgjigje të menjëhershme.”
Një njoftim për aviatorët (NOTAM) i postuar në faqen e Administratës Federale të Aviacionit të SHBA tha se Aeroporti Chopin i Varshavës dhe të paktën dy aeroporte të tjera në Poloni ishin të padisponueshme “për shkak të aktivitetit të paparashikuar ushtarak të lidhur me garantimin e sigurisë së shtetit.”
Më herët, Forcat Ajrore të Ukrainës thanë në aplikacionin Telegram se dronët po shkonin drejt perëndimit dhe po kërcënonin qytetin Zamosc në Poloni, por deklarata është fshirë më pas, raportoi Reuters.
Nuk ishte menjëherë e qartë sa dronë ndodheshin në hapësirën ajrore të Polonisë.
Mediat ukrainase raportuan se të paktën një dron po drejtohej drejt qytetit perëndimor polak Rzeszow.
CNN nuk mund të verifikojë në mënyrë të pavarur këto raportime.
Polonia më herët njoftoi se do të mbyllte kufirin lindor me aleaten ruse Bjellorusinë, për shkak të stërvitjeve të përbashkëta ushtarake ruso-bjelloruse që fillojnë të premten, raportoi Reuters.
Stërvitjet e mëdha Zapad 25, të cilat do të zhvillohen në Rusinë perëndimore dhe Bjellorusi, kanë ngritur shqetësime sigurie jo vetëm në Poloni, por edhe në vendet fqinje të NATO-s, Lituani dhe Letoni, sipas Reuters.
“Të premten fillojnë manovrat ruso-bjelloruse, shumë agresive nga perspektiva e doktrinës ushtarake, në Bjellorusi, shumë pranë kufirit polak,” tha kryeministri polak Donald Tusk në një mbledhje të qeverisë, sipas Reuters.
“Prandaj, për arsye të sigurisë kombëtare, do ta mbyllim kufirin me Bjellorusinë, përfshirë edhe kalimet hekurudhore, në lidhje me manovrat Zapad, të enjten në mesnatë,” tha Tusk.
