LSDM sot ka pyetur kryeministrin Hristijan Mickoski se a është rasti “Fushat e Dellçevës” arsyeja se pse ai frikësohet të kërkojë deklasifikimin e dokumenteve, që do t’i vërtetonin pretendimet e tij dhe ato të drejtorit aktual të Agjencisë së Sigurisë Kombëtare Bojan Hristovski, se është monitoruar dhe përgjuar ndërsa ishte në opozitë. Zëdhënësja e kësaj partie Bogdanka Kuzeska tha se Mickoski frikësohet se deklasifikimi I këtyre dokumenteve do të konfirmojë indikacionet e një krimi prej një milion dollarësh në rastin “Fushat e Dellçevës”.
BOGDANKA KUZESKA, ZËDHËNËSE E LSDM-SË
“Pse pas pothuajse një jave të publikimit të akuzave për mbikëqyrjen e Hristijan Mickoskit, as drejtori i Agjencisë së Sigurisë Kombëtare, Bojan Hristovski dhe as kryeministri Hristijan Mickoski nuk e kanë nisur procedurën për deklasifikimin e dokumenteve që do të vërtetonin akuzat e qeverisë? Pse ai vetë nuk kërkoi deklasifikimin e dokumentacionit nga Agjencia e Sigurisë Kombëtare në të cilin pretendohet se është monitoruar? Nga çfarë ka frikë Hristijan Mickoski? Le t’i kujtojmë publikut se në rastin “Fushat e Dellçevës” ishin të përfshirë bashkëpunëtorët më të ngushtë të Mickoskit, përfshirë një anëtar të sigurimit të tij personal, si dhe drejtori i atëhershëm i Pallatit të Bardhë, pra selisë qendrore të VMRO-DPMNE-së”.
