Me rastin e fillimit të vitit të ri shkollor, kryeparlamentari Afrim Gashi, ka uruar të gjithë nxënësit dhe mësimdhënësit, duke theksuar rëndësinë e arsimit si themel i një shoqërie të zhvilluar.
Në një mesazh të publikuar me këtë rast, Gashi shprehet:
“Në emër të deputetëve të Kuvendit të Republikës së Maqedonisë së Veriut dhe në emrin tim personal, kam kënaqësinë t’ju uroj të gjithë nxënësve dhe mësimdhënësve, një vit të ri shkollor me plot suksese, mbarësi dhe hapje të horizonteve të reja!”.
Ai nënvizoi se angazhimi institucional është i përqendruar në ndërtimin e një të ardhmeje më të mirë për gjeneratat e reja, duke e konsideruar arsimin si një investim afatgjatë në të ardhmen e vendit.
“Arsimi është themeli i shoqërisë, ndaj përkushtimi i çdo edukatori dhe përpjekja e çdo nxënësi është investim në ndërtimin e një brezi të ardhshëm që do të formësojnë një shoqëri më të zhvilluar”, shkruan Gashi.
Duke e përmbyllur urimin e tij, kryeparlamentari tha se fillimi i vitit shkollor është më shumë se një ngjarje kalendarike – është një fillim i ri për ëndrra dhe mundësi të reja:
“Sot zilja e shkollës është një thirrje për mundësi, dije dhe ëndrra të reja! Urime 1 Shtatorin!”.
