Sot jemi mbledhur këtu për një arsye të veçantë, për fëmijët tuaj. E di se çdo ditë përballeni me sfida që nuk janë të lehta: nga sigurimi i terapisë së duhur, te gjetja e mbështetjes në shkolla, e deri te mundësimi që ata të kenë mundësi të barabarta në shoqëri. Prandaj, sot nuk vij me fjalë boshe, por me një vizion dhe plan konkret. Kështu e ka nis fjalimin kandidati për Komunën e Çairit nga Aleanca Kombëtare për Integrim, Bujar Osmani, ndërsa ka takuar prindërit e fëmijëve me autizëm, ku edhe ka premtuar ndërimin e një Qendre Ditore për fëmijët me nevoja të veçanta.
“Një vend ku fëmijët tuaj do të marrin mbështetje defektologjike, logopedike dhe psikologjike, por edhe një vend ku do të ndihen të pranuar dhe të dashur. Qendra nuk do të jetë vetëm një institucion, por një shtëpi e dytë, me aktivitete që do të zhvillojnë talentet dhe aftësitë e tyre. Për ju, prindërit, do të sigurojmë këshillim dhe mbështetje profesionale, sepse e dimë se kujdesi për një fëmijë me aftësi të kufizuara është kujdes për tërë familjen. Do të krijojmë një fond për ndihmë financiare, përmes të cilit do të mbulohen një pjesë e shpenzimeve për barna, terapi dhe ndihmesa të veçanta. Ju nuk do të mbeteni vetëm në këtë betejë”, ka thënë Osmani.
Do ta bëjmë Çairin një komunë ndryshe, ka vijuar më tej Osmani, me ashensorë, shkolla dhe terrene loje të qasshme, sepse lëvizja dhe qasja nuk duhet të jenë privilegj, por e drejtë për çdo fëmijë.
“Gjithashtu, do të punojmë për të rrëzuar barrierat në shoqëri. Fëmijët me nevoja të veçanta do të marrin pjesë në aktivitete sportive, kulturore dhe argëtuese bashkë me bashkëmoshatarët e tyre. Inkluzioni është rruga e vërtetë drejt një komuniteti të shëndetshëm dhe të fortë.
Vizioni im është që Çairi të jetë një komunë pa barriera, një komunë ku çdo fëmijë do të ketë mundësi të barabartë për t’u rritur, për të mësuar dhe për t’u zhvilluar. Ju dhe fëmijët tuaj jeni në zemrën e programit tim, dhe unë do të jem këtu me ju edhe pas zgjedhjeve kur do të duhet ta shndërrojmë këtë vizion në realitet”, është shprehur Osmani, ndërsa ka preabtuar projektin “Çair për të gjithë fëmijët – Përfshirje dhe Mbështetje”.
“Trajtime falas defektologjike, logopedike dhe psikologjike për fëmijët familjet e të cilëve nuk kanë mundësi financiare. Aktivitetet psiko-fizike dhe edukative për zhvillimin e fëmijëve. Kujdes profesional dhe mbështetje të vazhdueshme për prindërit.Komuna do të sigurojë një hapësirë të pajisur dhe të përshtatur (klasa, salla terapeutike dhe kënd lojërash i qas shëm) brenda 12 muajve. Organizimi i aktiviteteve kulturore, sportive dhe argëtuese, ku fëmijët me nevoja të veçanta do të marrin pjesë bashkë me bashkëmoshatarët e tyre, duke thyer barrierat dhe paragjykimet”, tha Osmani, duke mos lënë anash mbështetjen për prindërit.
“Këshillimore dhe punëtori të rregullta për prindërit (ndihmë juridike, mbështetje psikologjike, informacione për të drejtat dhe përfitimet, grupe mbështetëse). Organizim të ngjarjeve dhe aktiviteteve në data ndërkombëtare të rëndësishme (si 2 prill – Dita Botërore e Autizmit, 3 dhjetor – Dita e Personave me Aftësi të Kufizuara), me qëllim ngritjen e ndërgjegjësimit publik dhe përfshirjen e komunitetit, si dhe
Do ketë mbështetje financiare për familjet. Komuna do të formojë një fond për mbështetje financiare, me të cilin do të mbulohen pjesërisht shpenzimet për ilaçe, terapi dhe mjete të posaçme ndihmëse (karroca për invalidë, aparate dëgjimi, mjete ortopedike). Mjetet do të shpërndahen në mënyrë transparente dhe të drejtë”.
Do të ketë edhe përshtatje të institucioneve publike dhe shkollave në Çair, tha Osmani, për të qenë të qasshme për të gjithë fëmijët.
