Koordinatori i diasporës i Aleancës për Shqiptarët për zonën e dytë zgjedhore, Lulzim Aliti, ka dalë me një reagim të ashpër në rrjetet sociale ndaj BDI-së dhe ish-bashkëpunëtorëve të saj, duke deklaruar se shqiptarët nuk shantazhohen më.
“Nuk shantazhohemi nga askush, as nga Gjoka, as nga Aliu, as nga Musa, e aq më pak nga Artani e Nikolla! Ne nuk i kemi as hak e as borxh askujt!”, ka shkruar Aliti, duke theksuar se populli i di mirë krimet dhe veprimet e së kaluarës.
Ai ka kujtuar ngjarje të shumta, si rastet e montuara gjyqësore “Allfa, Monstra, Lagja e Trimave, Sopotasit”, duke përmendur edhe komandantë që sipas tij u likuiduan pas luftës. Në shkrimin e tij, Aliti ka akuzuar drejtpërdrejt figura të larta të BDI-së, duke përmendur edhe Bujar Osmanin për skandalet e njohura nga përgjimet, si dhe sjelljen e ministrit të Jashtëm rus, Sergei Lavrov, në Shkup.
“Populli ju njeh! Sot të gjithë e shohin se shantazhoni edhe këta copë liderësh që po ecin pas jush me sy mbyllur”, shkruan ai, duke dërguar edhe një porosi për Ziadin Selën dhe Arben Taravarin: “BDI nuk reformohet me Blerimin e Bujarin, me Musën e Aliun. Ikni nga aty, se ju mori lumi!”.
