Me ndeshjen mes Shkupit dhe Vardarit sot do të fillojë xhiroja e 4-t në Ligën e Parë të Maqedonisë (PMFL).
Ndeshja do të luhet në Strumicë me fillim në orën 16:30, pasi stadiumi i Shkupit në Çair nuk i plotëson kriteret e nevojshme për zhvillimin e ndeshjeve të Ligës së Parë.
Shkupi do të përpiqet ta befasojë favoritin e vërtetë, ndërsa për Vardarin ky derbi, për shkak të kushteve, nuk do të ketë peshë dhe atmosferë siç do të kishte zakonisht në një derbi të madh qytetar.
“Para së gjithash, mendoj se na pret një ndeshje e vështirë. Shkupi është Shkupi, dhe në çfarëdo situate që të jetë, gjithmonë është një kundërshtar serioz për ne. Ne jemi të fokusuar vetëm në një gjë, fitoren. Nëse jemi në nivelin që dimë, pikët do të vijnë vetvetiu. Në ndeshjen e fundit nuk ishim në nivelin e nevojshëm dhe luajtëm papritur 2:2 në terrenin vendor me Brerën, prandaj tani mendimet tona janë të drejtuara vetëm drejt fitores”, deklaroi futbollisti i Vardarit, Mihail Manevski për faqen zyrtare të FFM-së.
“Kemi bërë analiza, pamë ku gabojmë dhe sot do të përpiqemi të përmirësohemi. Ne jemi Vardari, dihet çfarë do të thotë kjo, kështu që një duel me Shkupin apo me çdo kundërshtar tjetër nuk ndryshon shumë. Nuk do të jetë një ndeshje e lehtë, por cilësia jonë duhet të shfaqet në çdo dalje në fushë”, shtoi Manevski para ndeshjes së sotme.
