Bujar Osmani reagoi ashpër ndaj vendimit të Komisionit Shtetëror Zgjedhor për të zvogëluar numrin e këshilltarëve në komuna, gjë që, sipas tij, ky akt është fillimi i kthimit të majorizimit etnik dhe largim nga parimet e Marrëveshjes së Ohrit.
“Është skandaloz. Është fillim i kthimit të majorizimit etnik. Asnjëherë nuk ka ndodhur që rregullat zgjedhore të kalojnë me mbivotim. U tentua me ligjin për zgjedhje, që u bllokua fatmirësisht me Badinter. Por nuk ka ndodhur deri më tani që rregullat zgjedhore mos të adaptohen me konsensus”, tha Osmani.
Sipas tij, ky vendim është hapi i parë konkret në procesin që VMRO-DPMNE dhe partneri i saj i koalicionit VLEN po e shtyjnë nën radarin e publikut – rivendosjen e modelit të dominimit dhe përjashtimit të shqiptarëve nga institucionet dhe proceset.
“Ky është vetëm fillimi i asaj që ne po e paralajmërojmë, se po tentohet të kthehet koha e para marrëveshjes së Ohrit. Atëherë kur kishim majorizim etnik, kur kishim mbivotim, margjinalizim dhe përjashtim”, theksoi Osmani.
Osmani kujtoi se ky nuk është një incident i izoluar – përkundrazi, se tashmë ekziston një qasje sistemike për të zvogëluar ndikimin e shqiptarëve në të gjitha nivelet.
“Fillimisht, e ulën përqindjen nga 29% në 24.5%, në përcaktimin e fondeve që ndahen nëpër komuna dhe shkolla, pa e llogaritur diasporën, tash kanë vendosur numrin e këshilltarëve ta shkurtojnë. Nuk është problem vetëm shkurtimi në vete. Nuk është problem vetëm shkurtimi në vete. Është problemi i instalimit të praktikës së majorizimit dhe përjashtimit”, tha ai.
Në fund, Osmani veçoi vlerën thelbësore të Marrëveshjes së Ohrit, të nënshkruar 23 vjet më parë si bazë për stabilitet dhe unitet:
“Arsyeja pse është miratuar Marrëveshja e Ohrit është pikërisht ideja e majorizimit dhe mbivotimit etnik”.
BDI do të alarmojë çdo hap të institucioneve që çon në anulimin e parimeve të Marrëveshjes së Ohrit dhe do të mobilizojë të gjitha mekanizmat demokratikë për të mbrojtur barazinë politike të shqiptarëve në vend.
