Presidenti i Shteteve të Bashkuara, Donald Trump duket se ka bërë një hap pas në lidhje me negociatat mes Rusisë dhe Ukrainës për ndalimin e luftës.
Sipas zyrtarëve të administratës, presidenti amerikan synon t’ua lerë dy vendeve organizimin e një takimi mes liderëve të tyre pa luajtur vetë një rol direkt për momentin.
Sipas mediave të huaja, Trump u ka thënë këshilltarëve ditët e fundit se ai synon të organizojë një samit trepalësh me dy kreret e shteteve, Putin dhe Zelenskyn vetëm pasi ata të kenë zhvilluar fillimisht një takim mes tyre.
Edhe në një bisedë telefonike në një emission Trump tha se mendonte se do të ishte më mirë që Putin dhe Zelensky të bisedonin pa të në fillim.
Ndërkohë presidenti ukrainas Volodymyr Zelensky ka kërkuar detaje mbi garancitë e sigurisë brenda 7 deri 10 ditëve.
“Ne duam të kemi një kuptim të arkitekturës së garancive të sigurisë brenda shtatë deri në dhjetë ditë. Duhet të kuptojmë se çfarë janë të gatshëm të bëjnë secili vend në çdo moment specifik”, tha Zelensky.
Nga ana tjetër, Ministri i Jashtëm rus paralajmëroi se Moska duhet të ketë një veto efektive mbi çdo masë për të mbështetur Ukrainën sapo të arrihet një marrëveshje paqeje, duke minuar planet perëndimore për t’i ofruar Kievit garanci sigurie.
Në një seri vërejtjesh të ashpra Sergei Lavrov tha se propozimet evropiane për të vendosur trupa në Ukrainë pas një zgjidhjeje do të përbënin “ndërhyrje të huaj”, të cilën ai e quajti absolutisht të papranueshme për Rusinë.
Ai gjithashtu hodhi ujë të ftohtë mbi perspektivën e një samiti Putin-Zelensky, duke thënë se një takim dypalësh në nivelin më të lartë do të ishte i mundur vetëm “nëse të gjitha çështjet që kërkojnë diskutim përgatiten plotësisht”.
