Zëvendëskryeministri i parë dhe kandidati i VLEN-it për kryetar të Komunës së Çairit, Izet Mexhiti, ka publikuar pjesën e katërt të “Masterplanit për Çairin”, i cili po realizohet në bashkëpunim me arkitektin nga Stambolli, Bajram Vardar, me origjinë shqiptare dhe rrënjë nga Shkupi.
Këtë herë, fokusi i Mexhitit është Çarshia e Vjetër e Shkupit, të cilën ai e cilëson si boshtin kryesor ekonomik jo vetëm të Çairit, por të gjithë kryeqytetit.
“Ekonomia kryesore e Çairit është Çarshia e Vjetër, Çarshia më e madhe në Ballkan! 700 dyqane, shumë më e madhe se çarshia e Sarajevës dhe kur kam ardhur në vitin 2005 ajo ka qenë e frikshme që pas orës 17:00 të kalosh aty. Sot edhe në 12 të natë të shkosh, çarshia e Shkupit vlon, vlon nga turistët, vlon nga qytetarët tanë, vlon me shërbime, me biznese, ku minimumi 700 familje, por nuk janë 700 sepse me një dyqan ka staf, ka kallfa, ka qirak, ka partner, ka aksionar, d.m.th mbi 1 mijë familje, kryesisht të Çairit, të Shkupit aty e kanë ekzistencën, pra e kemi bërë një të mirë. Pra sot nëse ia rregullojmë edhe parkingun, ajo do të dyfishojë punën e Çarshisë së Vjetër, sepse problemi kryesor është: Dua të shkoj në Çarshi por nuk di ku të parkohem!”, kaq thënë Mexhiti.
Ai solli në vëmendje edhe transformimet që ka pësuar zona e njohur si “Rruga e Plastikave”, duke vënë në pah rolin e tij në mbrojtjen e bizneseve dhe familjeve që jetojnë nga to.
“Prej këtu nëse dalim tek rruga e plastikave, e mbajmë mend, ka pasur shtëpi me qerpiq aty, vërtetë nuk janë bërë të gjitha me plan, por sot duket 10 herë më mirë se si ka qenë para 15 viteve. P.sh ka pasur një tendencë aty kur e rekonstruan rrugën kanë vendosur disa trotuar të lartë që mos të mund të parkohesh më thellë! Nëse do e lejoshim ne atë trotuarin e lartë që ta vendos qyteti i Shkupit, u deshke që brenda dy jave të gjithë ato dyqane të mbyllen, krejt ato familje, krejt ato biznese aty me u zhduk, krejt ato familje me mbete pa punë, pa biznese, para bankrotit ose t’i marrin ato biznese edhe të shkojnë nëpër komunat e tjera. Ne diku kemi toleruar, nuk është bërë më e mira por nuk kemi leju një trotuar të lartë, kemi leju që të parkohen ashtu edhe siç është tani deri sa të bëhet një parking me të gjitha nishanet, t’ia ofrojmë qytetarit alternativën e mandej t’ia bëjmë dënimin”, ka thënë më tej Izet Mexhiti.
Me këtë Masterplan, kandidat i VLEN-it për Çairin, Izet Mexhiti premton se Çarshia e Vjetër do të jetë jo vetëm simbol historik, por edhe burim gjallërie, pune dhe prosperiteti për mijëra qytetarë të Shkupit.
