Në Dhomat e Specializuara të Kosovës në Hagë është marrë vendim për kufizimin e vizitave të ish-presidentit Hashim Thaçi për një grup prej 11 personash, në kuadër të çështjes “kundër administrimit të drejtësisë”.
Sipas vendimit të gjyqtares së procedurës paraprake, Marjorie Masselot, të marrë më 18 gusht 2025, Thaçit i ndalohet të ketë vizita jo të privilegjuara nga Artan Behrami, Blerim Shala, Ismail Syla, Vllaznim Kryeziu, Milaim Ahmetaj, Milaim Cakiqi, Avni Kastrati dhe katër persona të tjerë, emrat e të cilëve janë të redaktuar.
Vendimi vjen pas kërkesës së Prokurorisë, e cila kishte pretenduar se këta persona gjatë vizitave të mëparshme kishin folur me zë të ulët dhe kishin marrë udhëzime nga Thaçi për t’ua përcjellë dëshmitarëve. Sipas Prokurorisë, kjo paraqet rrezik për zbulimin e informacioneve konfidenciale.
Nga ana tjetër, mbrojtja e Thaçit e udhëhequr nga Sophie Menegon ka kundërshtuar këtë masë, duke e cilësuar atë si cenim të së drejtës për jetë private dhe familjare. Ata theksuan se kufizimet janë të panevojshme dhe të pajustifikuara.
Megjithatë, gjyqtarja Masselot ka konstatuar se kufizimet janë të domosdoshme për të mbrojtur integritetin e procedurës dhe për të shmangur rrezikun e zbulimit të informacioneve rreth dëshmitarëve të mbrojtur.
Në dokument thuhet se kufizimet vlejnë vetëm për individët për të cilët ka tregues të besueshëm se kanë marrë pjesë në vizita ku Thaçi ka zbuluar informacione konfidenciale.
