FC Shkupi ka reaguar ashpër pas situatës së krijuar me ndeshjen që duhej të zhvillohej në Strumicë. Klubi nga Çairi ka publikuar një deklaratë zyrtare, ku sqaron se kishte arritur marrëveshje me pronarët e stadiumit dhe kishte marrë miratimin e tyre me shkrim, dokument i cili ishte konfirmuar edhe në Federatën e Futbollit të Maqedonisë (FFM).
Megjithatë, në momentet e fundit, pronarët e stadiumit e kanë tërhequr miratimin, duke lënë klubin pa alternativë. Si pasojë, FC Shkupi ka paralajmëruar se çështjen do ta çojë në gjykatë.
“Fatkeqësisht, në momentin e fundit, pronarët e stadiumit e kanë tërhequr miratimin e dhënë, duke krijuar një problem të panevojshëm për klubin tonë. Për këtë arsye, FC Shkupi do ta ndjekë çështjen me rrugë ligjore”, thuhet në reagim.
Ndërkohë, klubi ka bërë të ditur se punimet për instalimin e sistemit VAR në stadiumin e vet tashmë kanë nisur dhe se ndeshjen e ardhshme në shtëpi planifikon ta zhvillojë përpara tifozëve shkupjanë.
Presidenti i klubit, Yasin Konyali, gjithashtu bëri thirrje që futbolli të mos përdoret për qëllime politike:
“Ju lutemi, mos e përdorni futbollin për fushatat tuaja politike dhe mos e pengoni sportin tonë. Futbolli u përket tifozëve, lojtarëve dhe klubeve – jo politikës”.
FC Shkupi falënderoi tifozët për mbështetjen dhe theksoi se me solidaritet dhe bashkim, do të kapërcejë çdo pengesë.
