Kandidati i VLEN për kryetar të Komunës së Likovës, Nexhmedin Sadiku, ka reaguar ashpër ndaj mungesës së njësisë së zjarrfikësve dhe shtabit emergjent në këtë komunë, duke theksuar se kjo është pasojë e papërgjegjësisë së qeverisjes shumëvjeçare të BDI-së.
Sadiku tha se edhe pas 24 viteve në pushtet, Likova vazhdon të mbetet e pambrojtur përballë fatkeqësive natyrore, ku këtë vit zjarret kanë rrezikuar familjet, bujqësinë dhe pasurinë e banorëve.
“Banorët, të trishtuar e të pambrojtur, po përballen vet e të vetëm me flakët, ndërsa drejtuesit e komunës tregojnë papërgjegjësi të plotë. Në mandatin tim, prioriteti i parë do të jetë themelimi i njësisë së zjarrfikësve dhe shtabit emergjent, që asnjëherë më banorët tanë të mos mbeten në mëshirën e fatit. Koha e premtimeve boshe ka mbaruar, koha për përgjegjësi fillon tani!”, u shpreh Sadiku.
Ai theksoi se banorët e Likovës meritojnë siguri dhe mbrojtje, jo vetëm premtime zgjedhore.
