Nga sot fillon fushata e Qeverisë për uljen e çmimeve të pajisjeve shkollore për 10 dhe 15 përqind.
Duke pasur parasysh që një pjesë e tregtarëve para fillimit të vitit të ri shkollor i rrisin në mënyrë të tepëruar çmimet e pajisjeve shkollore, gjë që ndikon drejtpërdrejt në rritjen e shpenzimeve të buxhetit familjar të mijëra qytetarëve, Qeveria në mbledhjen e fundit mori vendim dhe i obligoi tregtarët që t’i ulin çmimet për së paku 10 dhe 15 për qind, vendim që do të vlejë nga sot, 15 gusht, deri më 15 shtator.
Tregtarët me shumicë do t’i ulin çmimet e pajisjeve shkollore për së paku 10 për qind, ndërsa në tregtinë me pakicë për së paku 15 përqind.
Me këtë vendim ulen çmimet e çantave, fletoreve, blloqeve, kolazheve, lapsave dhe stilolapsave (ekonomikë, plastikë), lapsave të drurit me ngjyra dhe ngjyra vaji, plastelinës, brumit për modelim, shtrojeve, flomasterëve dhe shënuesve për tekst, tempera, akrilik, ngjyrave të ujit dhe furçave, vizoreve dhe materialeve didaktike, mprehësve dhe gomave, gërshërëve për fëmijë, panelëve dhe kutive lapsash, ngjitësit, kompasave, kalkulatorëve, letrës dekorative, fashikujve dhe çantave prej kartoni dhe materialeve të punimit, si dhe produkteve të tjera të nevojshme për nxënësit, gjë që do të thotë çmime më të ulëta dhe qasje për të gjithë qytetarët tanë.
Gjithashtu tregtarët janë të obliguar që, përveç çmimit të ri të ulur të produkteve, ta publikojnë edhe çmimin e vjetër që ka qenë në fuqi më 01.06.2025, çmim i cili merret si çmim bazë mbi të cilin përcaktohet ulja, pastaj para hyrjes së objektit tregtar apo në një vend tjetër të dukshëm brenda shitores, duhet të jetë qartë dhe dukshëm i vendosur një pllakatë në format prej së paku A3, i cili do të përmbajë mbishkrimin “Më pak shpenzime, më shumë për ty”, i publikuar në ueb faqen e Ministrisë së Ekonomisë dhe Punës, si dhe mbishkrimin: ZBRITJE E PAJISJEVE SHKOLLORE, prej së paku 15%.
Apelojmë që të mos bëhen përpjekje për ta anashkaluar vendimin, sepse Inspektorati Shtetëror i Tregut do të monitorojë në terren nëse ai po respektohet. Në të kundërtën, do të pasojnë sanksione, sepse çdo vendim i marrë në interes të qytetarëve duhet të zbatohet.
Me këtë jo vetëm që do të ulen në mënyrë drastike çmimet e pajisjeve shkollore, por gjithashtu, sipas analizave të caktuara, shpenzimet e mijëra familjeve që kanë nxënës do të përgjysmohen.
Qeveria është e përqendruar në marrjen e masave konkrete që do të përmirësojnë standardin e jetesës dhe situatën ekonomike.
Më pak shpenzime, më shumë për ty, kujdesemi!
