Kallëzime penale për udhëheqjen e NP “Parqe dhe Gjelbërim” dhe grevë para Qytetit të Shkupit bashkë me familjet, paralajmërojnë rreth 60 të punësuar në shoqëritë me përgjegjësi të kufizuar “Florakom” dhe “Luna”, kompani të lidhura me Ndërmarrjen Publike “Parqe dhe Gjelbërim”. Ata për herë të katërt, me bllokadë të bulevardit Ilinden, protestojnë për dy paga të papaguara, për shkak të të cilave nuk kanë as sigurim shëndetësor. Sindikata me akuzë për presione ndaj të punësuarve.
“Gjatë ditës së djeshme u përballën me presione nga udhëheqësia e NP “Parqe dhe Gjelbërim” – Shkup që të mos dalin në protestë, gjegjësisht të mos kërkojnë realizimin e të drejtës për pagesën e pagave. Që nga e hëna, për shkak se me mosshlyerjen e pagave dhe sigurimit shëndetësor për të punësuarit në këto dy kompani dhe për familjet e tyre u rrezikohet shëndeti, ne do të paraqesim kallëzime penale dhe padi përkatëse kundër drejtuesisë, gjegjësisht drejtorit të NP “Parqe dhe Gjelbërim”, tha Stojançe Kashikovski – kryetar i Sindikatës së punëtorëve të Hotelerisë, Turizmit dhe Komunales.
Të punësuarit janë të revoltuar që ende nuk u paguhen pagat megjithëse para dy javësh ishin miratuar subvencione prej 80 milionë denarësh nga Qyteti i Shkupit. Vendimin se çfarë do të bëjnë më tej dhe nëse do të ketë grevë të përgjithshme do ta marrin të hënën.
“Nuk e përjashtojmë që në të ardhmen bllokadat t’i bëjmë para Qytetit të Shkupit dhe bashkë me të punësuarit të dalin edhe familjet e tyre. Gjithashtu, nëse nuk gjendet zgjidhje gjatë ditës së nesërme, gjegjësisht nuk u paguhen pagat, të punësuarit do të vendosin, dhe ne si sindikatë, nëse do të thërrasim – gjë që na lejon Ligji për ndërmarrje publike – edhe ndërmarrjet e tjera publike për një grevë solidariteti”, shtoi Stojançe Kashikovski – kryetar i Sindikatës së punëtorëve të Hotelerisë, Turizmit dhe Komunales.
Nga Sindikata theksuan se deri tani të punësuarit i kryenin detyrat e punës, por do të ndalojnë nëse hyjnë në grevë të përgjithshme. Situata mund të ndërlikohet nëse me ta solidarizohen edhe rreth 700 të punësuar në “Parqe dhe Gjelbërim”.
