Presidenti i SHBA, Donald Trump deklaroi këtë javë, para nisjes në Alsaka ku do të takohet me homologun e tij rus, Vladimir Putin, se takimi i radhës mund të jetë “me Zelenskyn dhe Putinin, ose me Zelenskyn, Putinin dhe mua”.
Presidenti i SHBA shprehu sërish dëshirën e tij për të “përshpejtuar proceset për një armëpushim” në Ukrainë, duke lënë të hapur mundësinë për një samit trepalësh në ditët në vijim.
Sipas rrjetit televiziv amerikan CBS Neës, i cili citon burime të sigurta dhe të pavarura, administrata amerikane është në kërkim të një vendi të përshtatshëm për zhvillimin e një samiti të tillë në fund të javës së ardhshme.
Kjo lëvizje vjen vetëm pak ditë përpara takimit të planifikuar mes Trump dhe Putin, i cili do të zhvillohet më 15 gusht në Alaska. Presidenti amerikan kishte paralajmëruar më herët këtë takim më 8 gusht, ndërsa edhe Kremlini, përmes ndihmësit të Putinit, Yuri Ushakov, e ka konfirmuar axhendën.
Sipas Ushakov, takimi do të fokusohet në mundësitë për arritjen e një zgjidhjeje paqësore dhe afatgjatë për krizën në Ukrainë. Ai gjithashtu theksoi se Kremlini pret që takimi i ardhshëm mes Putinit dhe Trump të zhvillohet në tokën ruse.
