Ministri i Politikës Sociale, Demografisë dhe të Rinjve, Fatmir Limani, sot, në deklaratën e tij për mediat, njoftoi mbi fillimin e procesit të provimeve profesionale për marrje të licencave të punës në institucionet e fëmijëve, proces ky, i cili ka ngecur që nga viti 2023.
Në fjalimin e tij para mediave, ai theksoi se licenca e punës për edukatorët, përkëdhelësit, punëtorët profesionalë, bashkëpunëtorët dhe drejtorët është parakusht i detyrueshëm për punësim në kopshte.
“Për shkak të sistemit elektronik jofunksional për procesin e provimit, një numër i madh kandidatësh nuk kishin qasje në të, gjë që shkaktoi vonesë pikërisht kur kishim nevojë më të madhe për kuadër në kopshte në nivel kombëtar”. Me qëllim tejkalimin e kësaj situate, bëmë ndryshime në Ligjin e Mbrojtjes së Fëmijëve, të cilat lejojnë që provimi profesional të zhvillohet në formë letre si zgjidhje e përkohshme, deri më 1 janar 2026. Pas këtij afati, procesi i licencimit do të vazhdojë në mënyrë elektronike” – theksoi Limani.
Sot, rreth 350 persona po i nënshtrohen provimit, dhe deri në fund të këtij muaji, edhe 350 kandidatë të tjerë do të kenë mundësinë ta përfundojnë këtë proces të rëndësishëm dhe ta marrin licencën përkatëse të punës.
“Dua të nënvizoj se të gjitha kërkesat e pranuara për marrje të licencës po shqyrtohen në detaje dhe secili kërkues do të kontaktohet nga ana e Komisionit. Ministria mbetet e përkushtuar në krijimin e sistemit të drejtë, gjithëpërfshirës dhe efikas të mbrojtjes së fëmijëve” – potencoi Limani.
Ministri theksoi se me ndryshimin e ligjit krijohen kushte për punësime të reja dhe mbështeten profesionistët e rinj, të cilët do të kontribuojnë në ndërtimin e së ardhmes së gjeneratave më të reja.
