Më 12.08.2025, rreth orës 18:55, zyrtarë policorë nga Stacioni Policor Karposh arrestuan I.A. (55) nga Shkupi, i dyshuar për kryerjen e veprës penale “Rrezikimi i sigurisë së trafikut ajror” sipas nenit 303 të Kodit Penal.
Ngjarja ka ndodhur më 06.07.2025, rreth orës 18:00, kur një helikopter policor po afrohej pranë vendit ku lumi Lepenc bashkohet me lumin Vardar për të mbushur ujë me qëllim shuarjen e një zjarri në zonën e Bllacës. Pilotët vunë re një person që kishte hyrë në pjesën e cekët të shtratit të Vardarit dhe po bënte me duar shenja, ndërsa më pas u informuan nga dëshmitarë në vendngjarje se i njëjti person kishte hedhur gurë drejt helikopterit tip “Bell 412”.
Për shkak të kësaj sjelljeje, pilotët u detyruan të ndryshojnë vendin e furnizimit me ujë, pasi ishin vendosur në një situatë rreziku të madh, në një kohë kur po kryenin detyra në shërbim të shtetit dhe qytetarëve.
Pas masave hetimore, I.A. u lokalizua dhe u arrestua. Ngjarja është dokumentuar dhe ndaj tij do të paraqitet kallëzim penal përkatës.
