Në fshatin Luboten sot u përkujtua 12 gushti 2001, një nga ditët më të dhimbshme për banorët e kësaj ane dhe për gjithë shqiptarët. Në këtë ceremoni mori pjesë edhe zëvendëskryeministri Arben Fetai si dhe liderët e tjerë të VLEN, bashkë me familjarët e dëshmorëve, ish-ushtarë të UÇK-së dhe banorë të fshatit.
Fetai rikujtoi se në mëngjesin e asaj dite, forcat policore-ushtarake të shtetit ndërmorën një operacion të egër e të pajustifikuar, ku u vranë dhjetë civilë shqiptarë, mes tyre edhe 6-vjeçari Erxhan Aliu, “simbol i pafajësisë së shuar padrejtësisht”.
Ai përmendi me nder emrat e Dalip Muratit, Muharrem Ramadanit, Memet Memetit, Rami Jusufit, Xhelal Bajramit, Kadri Jasharit, Bajram Jasharit, Sulejman Bajramit dhe Atulla Qailit, të cilët, sipas tij, janë “gdhendur përjetësisht në kujtesën kolektive si dëshmi e një krimi që nuk do të harrohet kurrë”.
Masakra e Lubotenit është rasti i vetëm i luftës së vitit 2001 që është gjykuar nga Tribunali Ndërkombëtar i Hagës, duke u kualifikuar si krim lufte. “Ky ishte një hap drejt drejtësisë, por jo i mjaftueshëm për të shëruar këtë plagë. Të mos harrojmë kurrë që të mos përsëritet kurrë. Lavdi dhe nderim i përjetshëm për dëshmorët”, theksoi Fetai.
