Ministri i Politikës Sociale, Demografisë dhe Rinisë, Fatmir Limani, ka bërë të ditur sot se janë realizuar mbi 250 punësime dhe avancime në institucione kyçe, duke e cilësuar këtë si një hap konkret drejt forcimit të shërbimeve publike dhe përfaqësimit të drejtë.
Sipas tij, 150 punësime të reja janë bërë në Qendrat për Punë Sociale, gjë që, siç u shpreh ai, “do të mundësojë më shumë kapacitete dhe shërbime më cilësore për qytetarët”. Gjithashtu, mbi 100 vendime punësimi janë marrë për kopshtet e fëmijëve, duke përfshirë edhe rastin e 15 edukatoreve dhe përgëdhelëseve të kopshtit “8 Marsi” në Strugë, të cilat pas 5 deri në 16 vite pune me pasiguri ligjore, tani kanë marrë kontrata të përhershme.
Limani vuri theksin edhe te përfaqësimi etnik, duke theksuar se 8 shqiptarë janë bërë pjesë e ekipit të Projektit të Bankës Botërore, ndërsa numri i këshilltarëve shtetërorë shqiptarë është rritur nga 1 në 5. Sipas tij, përfaqësimi i drejtë ka përfshirë gjithashtu edhe komunitetet turke dhe rome. “Ky është ndryshimi që kemi premtuar, nga fjalët te veprat, duke ndërtuar institucione për të gjithë, pa dallim etnie”, deklaroi ministri.
https://www.facebook.com/share/p/1CvwP6XPKP/
