Për vitin e katërt me radhë, Komuna e Gostivarit organizoi Shkollën Verore ku nxënësit angazhohen edhe gjatë pushimeve verore.
Në ndarjen e mirënjohjeve për pjesëmarrjen në këtë shkollë verore i pranishëm ishte edhe kryetari i Komunës së Gostivarit, Valbon Limani i cili uroi nxënësit për pjesëmarrjen dhe falënderoi mentorët për angazhimin e tyre gjatë këtij muaji.
“Sot mbaroi shkolla verore në të cilën ishin të kyçur afër 200 fëmijë, në disa fusha. Kishte basketboll, hendboll, art figurativ, gjuhë shqipe për fëmijët e mërgimtarëve dhe numrin e konsiderueshëm të fëmijëve të mërgimtarëve të cilët janë paraqitur këtë vit në gjuhën amtare dhe shpresoj se vitin e ardhshëm, ky numër do të rritet”, u shpreh Limani.
Kryetari i Komunës Valbon Limani potencoi se këto aktivitete kanë qenë të mirëpritura nga fëmijët dhe se ky është viti i katërt me radhë që Komuna e Organizon këtë shkollë verore.
“Ky është viti i katërt me radhë dhe shpresoj se do të vazhdoj edhe vitin duke e bërë traditë dhe me shumë gjasa do të rrisim edhe aktivitetet edhe në disa fusha tjera”, u shpreh Limani.
Ndryshe, Shkolla Verore që e organizon Komuna e Gostivarit është aktivitet për nxënësit gjatë pushimit veror në mënyrë që të largojë sa më shumë nxënësit telefonat celularë gjatë sezonit veror dhe po ashtu të zbulohen talentë të rinj.
