Deri të shtunën më 9 gusht është afati i fundit kur Kuvendi duhet t’i shpallë zyrtarisht zgjedhje lokale që do të mbahen më 19 tetor. Qytetarët nëpërmjet dy rretheve zgjedhore në 80 komuna dhe Qytetin e Shkupit do të zgjedhin kryetarët dhe këshillat që do të udhëheqin me komunat në katër vitet e ardhshme.
Për zbatimin e tërë procesit zgjedhor shteti ka ndarë rreth 10 milionë euro. Dy të treta e këtyre parave janë për reklamim politik të kandidatëve nëpër media, ndërsa një pjesë tjetër për kompensime për anëtarët e këshillave zgjedhor, por edhe transportin dhe logjistikën lidhur me materialin votues.
Menjëherë pasi Kuvendi t’i shpallë zgjedhjet, Komisioni Shtetëror Zgjedhor duhet të mbajë seancë në të cilën do të publikohet kalendari i të gjitha afateve dhe veprimeve zgjedhore, por edhe obligimet e pjesëmarrësve në zgjedhje, mediave dhe organeve zgjedhore.
Ndërkohë, deri në fund të muajit duhet të zgjidhen 21 mijë administratorë që do të angazhohen në këshillat zgjedhor në rreth 3.500 vendvotime. Pos tyre edhe partitë që kanë fituar më shumë vota në zgjedhjet e kaluara, VMRO-DPMNE, LSDM, BDI dhe VLEN duhet të propozojnë edhe 14.000 anëtarë të këshillave zgjedhor.
Kontrolli i Listës Zgjedhore, fillon 15 ditë pas shpalljes së zgjedhjeve dhe zgjatë gjithsej 20 ditë. Qytetarët, gjatë asaj kohe mund t’i verifikojnë të dhënat e tyre dhe nëse ka parregullsi të kërkojnë të ndryshohen.
