Zëvendësdrejtori i Agjencisë për Mbështetje Financiare në Bujqësi dhe Zhvillim Rural (AMFBZHR), Mevlan Morina, ka njoftuar përmes një deklarate publike se gjatë procesit të zmadhimit të kapaciteteve kadrovike, në këtë institucion janë punësuar nëntë shqiptarë të rinj.
“Kjo na forcon si institucion për të përballuar më mirë ngarkesën e punës dhe për të përmirësuar cilësinë e shërbimeve”, u shpreh Morina, duke e cilësuar këtë zhvillim si një hap të rëndësishëm në drejtim të përfaqësimit të drejtë dhe adekuat të shqiptarëve, por edhe të rritjes së funksionalitetit institucional.
Ai theksoi se AMFBZHR tashmë ka njerëz që kujdesen me përkushtim për bujqit shqiptarë, për interesin publik dhe për barazi reale në sektorin bujqësor. “Në AMFBZHR ka kush kujdeset për përfaqësimin e drejtë dhe adekuat, ka kush kujdeset për bujqit, ka kush kujdeset për gjitha aspektet e funksionimit”, theksoi Morina.
Zëvendësdrejtori u ndal edhe te kritikat e vazhdueshme politike, duke i cilësuar si të pabaza dhe të motivuara nga interesa të ngushta ditore: “Ata që me teoritë dhe deklaratat ‘spektakolare’ duan t’i dëmtojnë proceset për poena ditore politike, e gjitha iu bie në ujë!”.
