Ministri i Shëndetësisë, Azir Aliu, së bashku me Kryeministrin Hristijan Mickoski, vizituan Klinikën për Vesh, Hundë dhe Fyt (ORL), ku u prezantuan investimet e realizuara për përmirësimin e infrastrukturës, teknologjisë mjekësore dhe fuqizimin e stafit profesional.
“Politikat tona për shëndetësi moderne dhe të afërt me qytetarët po marrin formë konkrete”, tha ministri Aliu, duke theksuar se katër salla operacioni janë rinovuar nga themeli, sipas standardeve më të larta bashkëkohore. Krahas kësaj, klinika është pajisur me endoskopë fleksibil transnazal me fibër optike, që përmirësojnë ndjeshëm diagnostikimin në nivel ambulantor dhe spitalor.
Në kuadër të përmirësimeve teknologjike, janë siguruar edhe dy makina anesteziologjike të teknologjisë së fundit, të përshtatshme për pacientë të rritur dhe pediatrik, duke garantuar siguri maksimale dhe lehtësi në përdorim për ekipin mjekësor.
Përveç përmirësimeve infrastrukturore dhe teknologjike, është bërë edhe zgjerimi i stafit. Janë punësuar tre specializantë të rinj, dy në ORL dhe një në anesteziologji, pesë infermiere dhe tre administratorë.
Ministri Aliu theksoi se investimet e tilla janë dëshmi e qartë e përkushtimit për ndërtimin e një sistemi shëndetësor më efikas, më të sigurt dhe në përputhje me standardet evropiane.
