Drejtori i Inspektoratit për Përdorimin e Gjuhëve, Arsim Idrizi, ka njoftuar se është zgjidhur çështja e tabelës në një nga filialet e Ministrisë së Transformimit Digjital në Kumanovë. Ai ka shkruar se përfaqësuesit e BDI-së në Kumanovë më shumë përpiqen të mbulojnë problemin se sa ta zgjidhin atë.
“A janë këta përfaqësues të institucioneve komunale të paguar për të kryer detyrat e tyre administrative, për të mbrojtur interesin publik dhe për të garantuar respektimin e ligjit, apo për të dalë nëpër konferenca e rrjete sociale për të bërë spektakël politik? Pse për një çështje kaq të ndjeshme siç është vendosja e tabelave në një gjuhë, përgjigjen më të mirë duhet ta japin vetë bashkëpartiakët e tyre dhe na çojnë te ‘padronët’ e tyre politikë, që për 24 vjet kanë qeverisur me folklorizëm, me propagandë, e pa asnjë mekanizëm real për të parandaluar devijime të tilla?”, kanë shkruar Idrizi.
Idrizi ka shtuar se në vend që të kërkojnë llogari nga vetvetja dhe nga ata që i kanë sjellë deri këtu, ata na japin fjalë të zbrazëta. Kjo është e papranueshme.
“Është koha që këta (opozita) të reformohen jo të fshihen pas konferencave për shtyp dhe deklaratave boshe”, ka nënvizuar në fund Idrizi.
