Pas 1 Majit, Hristijan Mickoski dhe Arben Taravari do të ulen në një takim të përbashkët, nga i cili, sipas zyrës për shtyp të Qeverisë, do të varet edhe qëndrimi i Taravarit në kabinetin qeveritar. Nga Qeveria nuk dhanë më shumë detaje.
Sipas burimeve jozyrtare të televizionit Sitel, burime të larta qeveritare pohojnë se zhvillimet po ndiqen me kujdes dhe se në këtë moment nuk përjashtohet asnjë skenar.
Turbulencat në koalicionin VLEN tashmë janë shpërndarë edhe në Qeveri, pasi Taravari vendosi që në zgjedhjet lokale të garojë i vetëm.
Javën e kaluar ai deklaroi se bashkëpunimi me BDI nuk është një opsion, por gjatë fundjavës konfirmoi se kishte folur në telefon me Ali Ahmetin dhe nuk përjashtoi mundësinë për mbështetje të ndërsjellë në raundin e dytë të zgjedhjeve.
Zëvendëskryeministri Izet Mexhiti dje kërkoi publikisht nga kryeministri që ta shkarkojë Taravarin, ndërsa nga koalicioni VLEN sot i dërguan mesazh se jashtë këtij koalicioni ai nuk ka më legjitimitet.
Nga koalicioni ZNAM sot nuk deshën ta komentojnë sjelljen e Taravarit.
Arben Taravari, gjatë 8 viteve të fundit, ka hyrë dhe ka dalë nga Qeveria plot katër herë. Aktualisht, ai kontrollon pesë deputetë në Kuvend.
