Kryetari i Komunës së Çairit, Visar Ganiu, në një intervistë për edicionin e lajmeve në Alsat M, ka deklaruar se nuk ka më komunikim zyrtar me Arben Taravarin dhe grupin e tij brenda Aleancës për Shqiptarët, duke e cilësuar rikthimin e tyre te BDI-ja si veprim të paarsyeshëm dhe zhgënjyes.
“Nuk kemi komunikim zyrtar me z. Taravarin. Tek-tuk lajmërohen sepse ne kemi shoqëri tonën edhe atje dhe, nga informatat që i kemi në strukturat, nga njerëz të cilët janë kalitur dhe e kanë themeluar Aleancën për Shqiptarët ose kanë krijuar një ideologji kundër BDI-së si oponent, janë shumë të zhgënjyer,” u shpreh Ganiu.
Ai shtoi se është e pamundur të kuptohet racionalisht se çfarë po ndodh me Taravarin dhe drejtuesit e tij politikë: “Ne nuk po mund as ta imagjinojmë dhe as ta shpjegojmë në mënyrë racionale se çka po ndodh me Taravarin dhe grupin e tij që ka në Aleancën për Shqiptarët, për arsye se nuk ka 1 vit që ata u larguan nga koalicioni me BDI-në, e dini me cilin narativ – se janë të korruptuar – dhe pas një viti të rreshtohen apo të bëjnë koalicion me një parti që funksionarët e tyre po bredhin gjyqeve e burgjeve si pasojë e korrupsionit të skajshëm, dhe një parti e cila është nongrata për ndërkombëtarët.”
Ganiu vlerësoi se ky veprim nuk është në përputhje me parimet që kishte ndjekur më herët Aleanca për Shqiptarët dhe është sinjal i një kthese të fortë që ka zhgënjyer edhe vetë bazën e partisë.
https://www.facebook.com/share/v/16A6cqiHg8/
