Zëvendëskryeministri i parë, Izet Mexhiti, ka bërë të ditur se Qeveria e Maqedonisë së Veriut ka miratuar ndryshimet dhe plotësimet në planin vjetor për ndërtimin, rikonstruksionin dhe përmirësimin e rrugëve shtetërore për vitin 2025.
Si pjesë e këtij programi janë miratuar dy projekte të mëdha infrastrukturore: Faza e dytë e qarkores së Tetovës, që do të lidhë nyjën Trebosh me Neproshten, zgjerimi dhe përmirësimi i sigurisë në aksin rrugor Kondovë-Radushë-Jegunoc, si dhe ndërtimi i qarkores së Svillares.
Mexhiti theksoi rëndësinë e këtyre projekteve për zhvillimin e infrastrukturës: “Këto investime do të lehtësojnë lëvizjen e qytetarëve dhe do të rrisin sigurinë në trafik, duke ndikuar pozitivisht në jetën e përditshme të qytetarëve”.
Sipas tij, projektet e miratuara dëshmojnë përkushtimin e qeverisë për të modernizuar rrugët dhe për të përmirësuar lidhjen mes qyteteve dhe rajoneve në Maqedoninë e Veriut.
