“Ndodhemi në Llaskarcë, ku para gjashtë vitesh si pasojë e aksidentit të autobusit të “Durmo Turs” humbën jetën tragjikisht 16 persona dhe 38 të tjerë u lënduan. Këtë vend, familjarët në shenjë të përkujtimit e vizitojnë çdo vit. Megjithatë, kërkesa e tyre është që të ketë drejtësi dhe përgjegjësi, por drejtësia e përgjegjësia ka ngecur në instancat gjyqësore tanimë gjashtë vite. Procesi gjyqësor, ende nuk ka epilog të plote fuqishëm”.
Mbetjet e qirinjve në lëndinën ku më 13 shkurt të vitit 2019, përfundoi i përmbysur autobusi i aksidentuar i kompanisë “Durmo Turs”, dëshmojnë se kujtimi për 16 personat që ndërruan jetë tragjikisht, ende mbahet i gjallë.
Tmerrin e asaj pasdite, e dëshmojnë edhe këto mbetje të bankinave, të cilat i kishte çarë autobusi pasi kishte dalë nga autostrada Shkup – Tetovë.
Krahas traumës dhe dhimbjes disavjeçare, familjarët e viktimave bartin edhe peshën e drejtësisë së ngadaltë, të cilës më së miri i përshtatet maksima e njohur drejtësi e vonuar, drejtësi e mohuar. Goran Davidovski, ka humbur në aksident vëllain e tij Zoranin. Shpresa për drejtësi, për të ka humbur.
“Ato janë trauma të rënda nëpërmjet të cilave kalojmë të gjithë ne që kemi humbur dikë në aksidentin e trafikut. E tani, nëse diçka do të ketë mendoj se të gjithë më e kanë humbur shpresën se diçka do të dalë në pah në këtë shtet. Ja të shohim tani me këto ndryshime, nëse dikush ka ndjenjë diçka të tërheqë. Shpresa e fundit vdes, por rëndë, shumë rëndë” – Goran Davidovski, vëllai i të ndjerit Zoran Davidovski.
Avokati i një pjese të familjarëve të viktimave, Vlladimir Nikollovski, thotë që janë shkelur të gjitha afatet ligjore, megjithatë shpreson që ajo është bërë me qëllim që të mos gjejë arsye Gjykata e Apelit për ta rikthyer lëndën nga e para. Pas gjashtë vitesh gjykim, ai dyshon në gjithçka, por thekson se ata duan vetëm drejtësi.
“Unë dyshoj në gjithçka, edhe në politikë, dhe se gjithçka është përzier këtu. Por, gjithsesi fundi do ta tregojë të veten, ne e duam vetëm drejtësinë, duhet të dihet se njerëz kanë humbur. Palët e mia, presin përfundim të kësaj lënde dhe asgjë nuk duam përveç drejtësisë. Asgjë. Dhe të jetë më e shpejtë, të mos jetë që të vdesin edhe palët e mia derisa ta presin drejtësinë” – Vlladimir Nikollovski, avokat i të dëmtuarve.
Më 25 janar të vitit të kaluar, pas një gjykimi të gjatë prej pesë vitesh, Gjykata Penale e Shkupit e shpalli aktgjykimin për çështjen e aksidentit, në të cilin u dënuan gjithsej gjashtë persona, ndonëse asnjëri se pranoi fajin. Me 14 vite burg u dënua shoferi, Manoil Trifunovski, ndërkaq me 4 vite pronari i kompanisë “Durmo”, Durmish Beluli. Përgjegjësi i kompanisë Remzi Miftari u dënua me 6 vjet, ndërkaq të punësuarit e kontrollit teknik, Igor Gjeorgjievski, Goran Dukovski dhe Jane Babarovski, me nga 5 vjet burg.
Megjithatë, vendimi nuk është i plotfuqishëm pasi palët janë ankuar në Gjykatën e Apelit. Aktgjykimi, zyrtarisht në Apel ka arritur më 22 tetor të vitit 2024, ndërkaq momentalisht është rikthyer sërish në shkallën e parë për shkak të lëshimeve administrative. Pas kthimit, duhet të caktohet seancë publike, e pastaj dhe të shpallet aktgjykimi. Kjo, nuk mund të parashikohet se sa mund të zgjasë, duke e pasur parasysh se bëhet fjalë për lëndë komplekse. /alsat.mk
