Operacioni i SPAK dhe Policisë së Shtetit, kush janë shefat e krimeve ndaj të cilëve GJKKO lëshoi urdhërarreste
Një operacion i gjerë me urdhër të SPAK po kryhet në bashkëpunim me Policinë e Shtetit.
Në këtë operacion mësohet se ka masa sigurie edhe për punonjës të policisë së shtetit që dyshohet se kanë shpërdoruar detyrën dhe janë të përfshirë në akte korruptive.
Hetimet e SPAK kanë nisur prej disa kohësh për efektivët e arrestuar, pasi në aplikacionet Sky Ecc rezultoi se këta të fundit ishin të përfshirë me banda kriminale në fushën e narkotikëve dhe jo vetëm.
Masat e sigurisë:
Në pranga ka rënë Shkëlzen Ruska, me detyrë shef krimesh në Himarë. Ruska akuzohet për kultivim kanabisi, grup i strukturuar kriminal, shpërdorim detyre dhe kryerja e veprave penale nga organizata kriminale.
Për të njëjtat akuza, në pranga ka rënë edhe shefi i Krimeve në Komisariatin e Lushnjes, Ervis Alisinanaj. Këtij të fundit i rëndon edhe akuza e ushtrimi i ndikimit të paligjshëm ndaj personave që ushtrojnë funksione publike.
I shpallur në kërkim është shefi i Komisariatit i Policisë Kufitare në Sarandë, Elvis Dërvishi i akuzuar për “trafikimi i narkotikëve”, “Grup i strukturuar kriminal”, “Kryerja e veprave penale nga organizata kriminale dhe grupi i strukturuar kriminal” dhe “Shpërdorim detyre”.
Erdit Hazizaj është personi tjetër i arrestuar nga AMP. Hazizaj është larguar nga Policia në vitin 2022. Ai akuzohet nga SPAK për trafik droge, kultivim i bimëve narkotike, grup i strukturuar, shpërdorim detyre etj.
