Qeveria ka siguruar fondet për Kampusin e Universitetit “Nënë Tereza” në Shkup
Sekretarja e Universitetit “Nënë Tereza” në Shkup ka reaguar ndaj akuzave të ish-ministrit të Arsimit dhe Shkencës, Jeton Shaqiri, i cili pretendoi se qeveria aktuale ka gënjyer opinionin lidhur me sigurimin e 35 milionë eurove për ndërtimin e Kampusit të ri universitar.
Me një qëndrim publik, ajo ka paraqitur vendimin e Qeverisë së RMV-së nga seanca e 46-të, ku janë siguruar fondet dhe është dhënë pëlqimi për furnizim shumëvjeçar publik për ndërtimin e kampusit.
“Me qëllim të informimit të drejtë të opinionit dhe heqjes së mjegullës nga lajmet e rreme, bashkëngjitur po e publikoj vendimin e Qeverisë së RMV-së nga seanca e 46-të, në të cilën janë siguruar mjetet financiare dhe është dhënë pëlqimi për furnizim shumëvjeçar publik. KAMPUSI I UNIVERSITETIT ‘NËNË TEREZA’ në Shkup, një ëndërr që po bëhet realitet! Urime!”, thuhet në deklaratë.
Ky reagim vjen pas pretendimeve të opozitës se projektet e premtuara nga qeveria nuk kanë mbështetje financiare, ndërsa Qeveria thekson se ka marrë vendime konkrete për realizimin e kampusit universitar.
