Komuna e Çairit nisi njërin nga pesëdhjetë projektet infrastrukturore të komunës. Në rrugën “Nexhat Agolli” në lagjen Seravë, filloi rikonstruimi i rrjetit të ujësjellësit dhe kanalizimit në gjatësi prej 250 metrash. Punimet kapin vlerën prej 9 milionë denarësh.
“Ky është një investim me të vërtetë i madh në Çair. Duke marrë parasysh edhe investimet tjera që bëhen përreth Çairit dhe që kanë lidhshmëri me Çairin, bëhet fjalë për një shumë të madhe dhe është një investim i paparë deri më tani për komunën tonë dhe qytetarët tanë. E gjithë kjo do të jetë në funksion të qytetarëve.”, – deklaroi kryetari i komunës së Çairit, Visar Ganiu.
Në praninë e zëvendëskryeministrit të parë, Izet Mexhiti, njeriu i parë i komunës së Çairit, tha se projektet e tjera do të jenë infrastrukturore, sikurse ndërtim të pishinave, çerdheve, si dhe investime nëpër shkolla.
Të gjitha punimet do të realizohen me 2.8 milionë euro që komuna fitoi nga granti qeveritar 100 milionë eurosh dedikuar komunave për projekte komunale.
