Një ditë pas përfundimit të zgjedhjeve Parlamentare në Republikën e Kosovës, interesimi vazhdon të jetë i lartë në mesin e opinionit si në vend, ashtu edhe në Kosovë. Edhe partitë politike në vendin tonë, të ndara për sa i përket përkrahjes dhe vlerësimit të zgjedhjeve. Tanimë e dimë qartë se koalicioni VLEN ka qenë fuqishëm në mbështetje të Lëvizjes “Vetëvendosje”, ndërsa nga Bashkimi Demokratik për Integrim kanë qenë në mbështetje të partive opozitare. Arben Taravari, njëri nga krerët e koalicionit VLEN e vlerëson si fitore të pritshme dhe plotësisht e merituar fitoren e LVV-së dhe kryeministrit aktual, Albin Kurti.
“E pritshme fitorja e Kurtit, e ku partia e dytë dhe e treta kanë më pak sesa Kurti, unë pres që kjo përqindje e Kurtit të rritet edhe me numërimin e votave nga diaspora. Pra, probabiliteti është i madh që Kurti ta bëjë përsëri qeverinë e vetme, por edhe nëse duhet të bëjë koalicion me dikë tjetër, mendoj se populli në Kosovë e dha verdiktin, dhe tregoi se besueshmërinë më të lartë dhe absolute e ka Kurti dhe unë mendoj se edhe vet Kosovës i duhet Kurti, që ta ketë edhe një mandat nën udhëheqje të Qeverisë.”, – deklaroi lideri i ASh-së, Arben Taravari.
Edhe koalicioni VLEN ka shprehur urimet për fitoren e madhe të Lëvizjes “Vetëvendosje” dhe kryeministrit, Albin Kurti, në zgjedhjet e para të rregullta në Republikën e Kosovës. Heshtje në bllokun opozitar shqiptar. Fronti Evropian ende nuk ka dalë me një vlerësim të përgjithshëm për zgjedhjet në Kosovë, edhe pse publikisht kanë përkrahur partitë opozitare
