Në Shqipëri, kryetari i Bashkisë së Tranës, Erion Veliaj u arrestua pasditen e sotme me urdhër të Prokurorisë së Posaçme kundër Krimit të Organizuar dh Korrupsionit. Oficerët e policisë gjyqësore u shfaqën në zyrën e tij rreth orës 14.00, dhe më pas e shoqëruan atë në mjediset e paraburgimit. Një urdhër arresti në shtëpi mësohet të jetë lëshuar dhe për bashkëshorten e tij Ajola Xoxa e cila rezulton të jetë jashtë Shqipërisë.
Për momentin nuk ka asnjë komunikim zyrtar nga Prokuroria e Posaçme, e cila në fund të muajit dhjetor bëri të ditur se në lidhje me hetimet që kishin përfshirë kryebashkiakun e Tiranës Erjon Veliaj dhe familjarë të tij, kishte të dhëna konkrete jo vetëm për “korrupsion pasiv”, por edhe për vepra të tjera penale si “korrupsion aktiv”, “pastrim parash” dhe “fshehje pasurish”.
Sipas prokurorisë, “konstatohet se ekzistojnë të dhëna konkrete që anëtarë të ngushtë të familjes si dhe familjarë të tjerë të afërt me Kryetarin e Bashkisë Tiranë, kanë marrë përfitime të paligjshme përmes disa shoqërive dhe individëve, të cilët kanë interesa të drejtpërdrejta në Bashkinë Tiranë”.
Gjatë hetimeve, po sipas prokurorisë, “janë evidentuar veprime konkrete të cilat përfshijnë transaksione financiare, kontrata të dyshimta dhe fatura të dyshuara fiktive të realizuara përmes disa shoqërive, të cilat janë në pronësi të regjistruar ose që kontrollohen faktikisht nga familjarët e ngushtë dhe familjarë të tjerë të Kryetarit të Bashkisë”.
Më herët oficerët e Byrosë Kombëtare të Hetimit kishin ushtruar kontrolle në zyrat e bashkëshortes së Veliajt, si dhe në banesat e zyrat e vëllait të tij. Vetë kryebashkiaku u thirr më 26 dhjetor përballë hetuesve, ku qëndroi për gati 5 orë. Ai deklaroi më vonë se ishte denoncuar nga një qytetar i quajtur Nesti Angoni, i cili siç u shpreh ai, “nuk ekziston”, duke e cilësuar denoncimin si një kurth të sajuar anonim, pa dhënë detaje të mëtejshme.
