Pas kryerjes së procedurës hetimore dhe shqyrtimit të të gjitha rrethanave, prokurori publik kompetent nga Prokuroria Themelore Publike Shkup ka ngritur kallëzim kundër gjithsej katër personave për incidentin e ndodhur më 14.10.2024 në afërsi të objektit të Komunës së Çairit, kur gjatë të shtëna me armë zjarri – pistoletë, një person mbeti i plagosur, transmeton Portalb.mk.
I pandehuri i parë akuzohet për – Krime të rënda kundër sigurisë së përgjithshme nga neni 292 paragrafi 1 lidhur me nenin 288 paragrafi 1, i pandehuri i dytë për – Shkaktimi të rrezikut të përgjithshëm nga neni 288 paragrafi 1 dhe pjesëmarrj3 në përleshje nga neni 132 paragrafi 1, derisa dy të tjerët akuzohen për veprën penale – Pjesëmarrje në përleshje nga neni 132 paragrafi 1 i Kodit Penal.
Materiali dëshmues i siguruar ka të bëjë me veprimet e secilit prej të akuzuarve individualisht, ku i akuzuari i parë gjatë një zënke në mënyrë të pakontrolluar ka gjuajtur një plumb me armë dhe ka shkaktuar lëndim të rëndë trupor – plagë me armë zjarri në pjesën e poshtme të këmbës së majtë të viktimës, i cili i shkaktoi të akuzuarit një prerje në kokë me një send të mprehtë. Tre të pandehurit e tjerë paraprakisht kishin nisur debatin verbal dhe përleshjen me viktimën. Gjatë gjithë ngjarjes, edhe i pandehuri i dytë në mënyrë të pakontrolluar ka tundur armën dhe ka gjuajtur një plumb në drejtim të panjohur, duke shkaktuar rrezik të konsiderueshëm për jetën dhe trupin e njerëzve.
Në momentin e kryerjes së krimit, i pandehuri i parë ishte person i dënuar, i cili ka shfrytëzuar beneficione në institucionin ku vuante dënimin, andaj për ato arsye kur ka nisur hetimi, prokurori publik ka sugjeruar që të caktohet masa e paraburgimit. Me ngritjen e aktakuzës është propozuar vazhdimi i masës së paraburgimit.
