Berat Gjimshiti ka qenë i pafat në ndeshjen e sotme mes Atalantës dhe Udinezes pasi si rrjedhojë e një përplasje kokë më kokë, u dëmtua dhe u desh të linte fushën i fashuar që në pjesën e parë të sfidës.
Klubi bergamask ka treguar se si ishte situata e mbrojtësit të kombëtares shqiptare, i cili kishte shkuar në spitalin e Udines për kontroll.
“Kontrollet e kryera në spitalin e Udines kanë konfirmuar se lojtari kishte një traumë në kokë pas një përplasje së bashku me një plagë në lartësinë e vetullës së djathtë për të cilën u deshën 10 qepje.
Gjimshiti po kthehet me skuadrën në Bergamo”, raportoi klubi i Atalantës për situatën e futbollistit.
Tani mbetet të shihet se sa do të mungojë futbollisti shqiptar nga fusha e lojës, pasi me një dëmtim të tillë në fytyrë, vështirë se do të jetë gati për duelin pas tre ditësh ndaj Juventusit.
