Kosova dhe ShBA-ja do ta finalizojnë së shpejti “dialogun strategjik”. Këtë e bëri të ditur presidentja e Kosovës, Vjosa Osmani pas takimit me zëvendëssekretarin e Shtetit Amerikan për Menaxhimin dhe Resurset, Riçard R. Verma.
“Lajm i shkëlqyeshëm për Republikën e Kosovës! Pas propozimit që i kam dërguar Shteteve të Bashkuara të Amerikës, si presidente e Republikës qysh në vitin 2021, pastaj rikonfirmuar në qershor të vitit 2022 nëpërmjet notës verbale, si dhe në takimin me sekretarin Blinken në korrik të vitit 2022, si dhe pas një pune të jashtëzakonshme të ekipeve tona përgjatë viteve të kaluara, sot në takim me zëvendëssekretarin amerikan, Riçard Verma, m’u konfirmua se Kosova dhe ShBA-ja do ta finalizojnë së shpejti “dialogun strategjik”.”, ka shkruar Osmani në rrjetet sociale.
Kjo është një e arritur e jashtëzakonshme që dëshmon se partneriteti i mirëfilltë, i bazuar në vlera dhe interesa të përbashkëta, gjithmonë sjell rezultate, thekson Osmani, e cila e falënderoi Qeverinë e Shteteve të Bashkuara të Amerikës për këtë përkrahje ndaj popullit të Kosovës.
“Ekipet tona do të takohen së shpejti për ta finalizuar marrëveshjen për Dialogun Strategjik, i cili do të përfshijë fusha shumë të rëndësishme në interes të qytetarëve të Kosovës.”, ka thënë Osmani.
Zëvendëssekretari amerikan i Shtetit për Menaxhimin dhe Resurset, Verma, u prit në takim edhe nga kryeministri, Albin Kurti.
