Zëvendëskryeministri për Qeverisje të Mirë, Arben Fetai, në emisionin debativ “ZOOM” në RTVM2, ka komentuar rreth propozim-ligjit për përfaqësim të drejtë dhe adekuat. Ai ka thënë se ky ligj ndodhet në fazën finale të përpilimit dhe pritet që këto ditë të arrihet dakordësia mes partnerëve të koalicionit qeveritar.
“Kemi bërë shumë takime dhe pas emisionit kam takimin e radhës ku do të shoh edhe draftin, pothuajse final të këtij ligji. Pra, gjatë kësaj jave kemi takimet e radhës dhe besoj shumë shpejt do të dakordohemi brenda grupit punues dhe me gjasë Ministria e Administratës Publike do të jetë bartëse e këtij procesi.”, ka thënë zëvendëskryeministri, Fetai, në emisionin “ZOOM”.
Sipas Fetait, pas 22 viteve, shqiptarët do të kenë një ligj i cili do të garantojë barabarësinë e tyre në institucionet shtetërore.
“Me futjen e ligjit do të krijojmë edhe obligime shtesë edhe mekanizma kontrolli, edhe mekanizma mbikëqyrjeje në mënyrë që të mos kemi më abuzime të llojit që i kishim me Balancuesin, ku një maqedonas deklarohej shqiptar, një turk, shqiptarë e kështu me radhë. Kjo më nuk do të jetë e mundur.”, tha mes tjerash zëvendëskryeministri, Fetai.
