Dhuna tek vajzat fillon aty ku ajo nuk duhet të ekzistojë kurrë – në familje. Babai është figura e parë mashkullore që një vajzë e vogël sheh si model në jetë. Ky ishte një prej mesazheve kyçe që dolën nga panel diskutimi i sotëm, me temë “Fuqizimi i Grave: Ndërgjegjësimi dhe Lufta Kundër Dhunës”, i mbajtur në sallën e komunës së Çairit.
Në këtë panel diskutimi morën pjesë Zëvendësministrja e Transportit dhe Lidhjeve, Kaltrina Zekolli, deputetet Merita Koxhaxhiku, Saranda Imeri, Feride Haxhiu, drejtoresha e shkollës Teuta Idrzi dhe psikologia nga qendra Savant, Hatixhe Sefa, të cilët kontribuan me mendimet e tyre dhe shembujt konkret mbi rëndësinë e edukatës dhe ndërgjegjësimit për luftën kundër dhunës.
Konkluzionet kryesore të diskutimit ishin se parandalimi i dhunës nis në familje, ku vajzat duhet të rriten me vlera barazie, respekti dhe dashurie. Gjithashtu, u theksua roli i institucioneve arsimore në edukimin e fëmijëve për barazinë gjinore dhe respektin. Për të ndërtuar një shoqëri pa dhunë, është e nevojshme një bashkëpunim mes institucioneve, organizatave dhe komunitetit për të ofruar mbështetje dhe edukim për vajzat dhe gratë. 
