Askush nuk është mbi ligjin dhe do të përballet me drejtësinë, deklaroi zëvendëskryeministri i parë, Izet Mexhiti, me ngritjen e hetimeve ndaj paraardhësit të tij, Grubi, dhe ish-drejtorit të Lotarisë Shtetërore, Përparim Bajrami. Mexhiti duke mos e komentuar vendndodhjen e Artan Grubit në Kosovë, deklaron se organet e hetuesisë do ta thonë fjalën e fundit për krimin në Lotari.
“Fjalën kryesore e kanë organet e rendit, në veçanti Gjyqësia dhe Prokuroria. Nuk do të ndërhyjmë, do të respektojmë rregullin derisa nuk dënohen, pra shpallen fajtorë. Ajo që nuk është paraqitur, sërish do t’ia lëmë organeve të rendit. Me rëndësi porosia është që askush nuk është mbi ligjin. Gjithkush që e ka shkelur ligjin duhet të përgjigjet para ligjit, ose nesër ose pasnesër. Mirëpo patjetër do të ketë ballafaqim.”, – deklaroi zëvendëskryeministri i parë, Izet Mexhiti.
