Murgesha Anna Donelli, vullnetare në burgun San Vittore të Milanos, dyshohet se ka vepruar si ndërmjetëse me grupin kriminal dhe anëtarët e bandës së tij të burgosur.
57-vjeçarja ishte në mesin e 25 personave të arrestuar si pjesë e një hetimi ndaj mafies Ndrangheta në qytetin verior të Brescias në Itali, thanë tre burime me njohuri të drejtpërdrejta për këtë çështje për agjencinë e lajmeve Reuters.
Donelli është gjithashtu e njohur për shërbimin e saj në lagjet e shkatërruara të Milanos dhe mori çmimin vjetor qytetar “Golden Panettone” në fillim të këtij viti.
Një deklaratë e policisë tha se dy politikanë vendas u arrestuan gjithashtu dhe se 1.8 milion € ishin sekuestruar në operacion, por nuk përmendi asnjë nga personat e shenjëstruar në bastisje.
Të dyshuarit akuzohen për krime të ndryshme, duke përfshirë shoqërimin mafioz, blerjen e votave, armëmbajtjen pa leje, pastrimin e parave, ndarjen e kredive, tregtimin e drogës dhe faturimin e rremë, shtoi policia.
Banda e supozuar ishte e lidhur me lëshimin e faturave me vlerë 12 milionë euro për transaksione inekzistente që u mundësonin sipërmarrësve bashkëpunëtorë të ulnin të ardhurat e tyre dhe të shmangnin taksat në këmbim të një komisioni të paguar për mafiozët.
Me origjinë nga rajoni i varfër jugor i Kalabrisë, ‘Ndrangheta’ ka evoluar në organizatën më të fuqishme mafioze të Italisë.
Grupi është përhapur në të gjithë Evropën dhe pjesën tjetër të botës, duke depërtuar në të ashtuquajturin krim të jakave të bardha.
