Kryetari i Komunës së Çairit Visar Ganiu nga sheshi “Skënderbeu” edhe njëher ka uruar Ditën e Pavarësisë për gjithë shqiptarët.
‘Pavarësisht sfidave, ne do të mbetemi gjithmonë të bashkuar, të fortë dhe krenarë. Në këtë natë ku festojmë lirinë, bashkimi ynë është forca që na mban të pathyeshëm!’, u shpreh mes tjerash Ganiu.
Postimi i plotë;
Në një mbrëmje të veçantë, në zemër të Shkupit, në sheshin “Skënderbeu”, sonte gjithçka dukej ndryshe. Qielli i hapur reflektonte ndriçimin e skenës dhe emocionet e zemrave që ishin mbledhur për të festuar Ditën e Pavarësisë. Të rrethuar nga flamuj kuq e zi që valëviteshin me krenari, atmosfera ishte e elektrizuar. Zërat e njerëzve, buzëqeshjet dhe krenaria ishin kudo.
Gjithçka nisi me himnin kombëtar, kënduar nga Valon Suma, një moment që mbushi sheshin me solemnitet e emocione dhe përfundoi me muzikën elektrizuese të DJ Electron, duke sjellë një atmosferë vibrante që mbajti të gjithë të pranishmit në këmbë deri në minutën e fundit.
Nga ky shesh, ku fryma e Skënderbeut duket sikur endet në çdo cep, i urova të gjithë qytetarët Gëzuar Ditën e Pavarësisë, duke i kujtuar se, pavarësisht sfidave, ne do të mbetemi gjithmonë të bashkuar, të fortë dhe krenarë. Në këtë natë ku festojmë lirinë, bashkimi ynë është forca që na mban të pathyeshëm!
