Protestuesit e opozitës që mbështetësin ish-kryeministrin Sali Berisha dhe aktivistë nga Partia e Lirisë kanë hedhur disa herë molotov në derën e Bashkisë Tiranë, gjatë protestës së radhës të mbajtur sot.
Ky është tubimi i katërt që mbahet para institucionit të drejtuar nga Erion Veliaj, ku opozita kërkon sërish dorëheqjen e tij nga detyra, pas skandalit të korrupsionit me dosjen “5D”.
Dera kryesore e Bashkisë së Tiranës është rrethuar me barriera hekuri dhe një kordon policie është stacionuar për të penguar protestuesit që të mësyjnë në ambientet e brendshme të këtij institucioni.
Një numër i lartë forcave të policisë rrethuan zonën. Të pranishëm në protestë ishin përfaqësues të Rithemelimit (fraksion i PD-së) dhe Partisë së Lirisë në Këshillin Bashkiak dhe përfaqësues nga Aleanca për Teatrin.
Në një moment pati tensione mes protestuesve dhe policisë ku u qëllua me motolov në ambientet e jashtme të bashkisë.
Me pankarta në duar, protestuesit u përplasën fizikisht me efektivët e policisë, të cilët ishin vendosur aty për mbarëvajtjen e tubimit.
