Stuhia e pasdites së djeshme që përfshiu Shkupin shkaktoi dhjetëra dëme materiale dhe qindra thirrje emergjente nga qytetarët. Era e fortë dhe reshjet intensive rrëzuan pemë, dëmtuan kabllo dhe shtylla elektrike, ndërsa në disa raste u raportuan dëmtime të automjeteve dhe pronës private. Numri emergjent i Qendrës së Menaxhimit të Krizave 112 regjistroi mbi 50 raste nga zona të ndryshme të kryeqytetit, të cilat u përcollën menjëherë tek shërbimet kompetente. Autoritetet njoftojnë se ekipet në terren po ndërhyjnë sipas prioritetit për të menaxhuar pasojat e motit të keq dhe për të rikthyer normalitetin në qytet.
“Si rezultat i motit të keq që përfshiu Qytetin e Shkupit, në numrin e thirrjeve emergjente 112 u raportuan pemë të rrëzuara, kabllo të këputura të EVN-së dhe në një pjesë të vogël dëmtime të pronës private, automjete, strehë, etj”, thonë nga Qendra e Menaxhimit të Krizave.
Të gjitha raportimet ata njoftuan se janë përcjellë deri tek shërbimet kompetente, të cilat ndërhyjnë sipas prioritetit me qëllim tejkalimin e gjendjes së krijuar./SHENJA/
