Sot nuk po ndajmë vetëm një lajm teknik apo një vendim administrativ, sot ndajmë një lajm zemre dhe ndërgjegjeje, një hap përpara drejt drejtësisë sociale, një dëshmi konkrete se fuqia e shtetit duhet të jetë në shërbim të njerëzve që kanë më shumë nevojë.
Qeveria përmes Ministrisë së Energjetikës, Minierave dhe Burimeve Minerale, ka publikuar shpalljen publike për mbështetje financiare të energjisë elektrike për familjet më të ndjeshme, një vendim që bart në vetvete jo vetëm vlerë ekonomike, por thellësisht humane.
Përmes kësaj mase, në total 42.3 milionë denarë do të shpërndahen si zbritje direkte prej 1.000 denarësh në muaj në faturat e energjisë elektrike, për një periudhë 1 vjeçare, për amvisëritë në të cilat jetojnë: Persona me aftësi të kufizuara, persona tërësisht të verbër ose të shurdhër, përfitues të kompensimit të veçantë sipas Ligjit për Mbrojtje Sociale.
Kjo nuk është lëmoshë, por drejtësi sociale. Kjo nuk është propagandë, por vepër konkrete. Kjo është një politikë e humanizmit që i jep kuptim fjalës “shtet”.
Të nderuar qytetarë,
Ne në VLEN besojmë se politika merr kuptim vetëm kur prek jetën reale të njerëzve. Dhe ky vendim e prek jetën reale të një nëne që rrit një fëmijë me aftësi të kufizuara, të një pensionisti që jeton me ndihmë sociale, të një qytetari që për dekada është ndjerë i harruar.
Ky është një hap modest në vlerë monetare, por shumë i madh në simbolikë. Sepse me këtë themi: “Shteti është këtu për ty. Nuk je vetëm”.
Të dashur qytetarë,
Energjia nuk është thjesht kilovat. Energjia nuk është thjesht megavat. Energjia është jetë. Energjia është siguri. Energjia është solidaritet.
Duke e orientuar mbështetjen aty ku dhimbja është më e thellë, ne po krijojmë një sistem ku drita nuk është luks, por e drejtë. Ku ngrohja nuk është privilegj, por domosdoshmëri.
Prandaj, ju bëjmë thirrje të gjithëve, aplikimi është i hapur. Informoni familjet, miqtë, fqinjët që mund të përfitojnë nga kjo masë. Le të mos mbetet askush pas. Le të jetë kjo një fushatë e përbashkët jo vetëm e qeverisë, por e ndërgjegjes kolektive. VLEN do të vazhdojë të mbështesë politika të tilla me gjithë zemrën dhe kapacitetin institucional. Sepse besojmë se një shoqëri është vërtet e fortë vetëm atëherë kur më i dobëti prej nesh ndihet i mbrojtur.
Faleminderit për besimin e durimin, faleminderit që së bashku po ndërtojmë një shtet që VLEN për të gjithë!
https://www.facebook.com/share/v/19addNSZY4/
