Komuna e Tetovës ka nisur zbatimin e dy projekteve të rëndësishme infrastrukturore në sistemin e furnizimit me ujë, të financuara në tërësi nga Qeveria e Republikës së Maqedonisë së Veriut, përmes kredisë hungareze dhe në kuadër të nënprogramit AA – Projekte infrastrukturore në Komuna për vitin 2024, nën mbikëqyrjen e Ministrisë së Ambientit Jetësor dhe Planifikimit Hapësinor.
Projektet përfshijnë:
🔹 Rikonstruimin e rrjetit të ujësjellësit në lagjen “Jashtë Vardarit”, me vlerë prej 15.248.478 denarë,
🔹 Rikonstruimin e tubacionit kryesor të ujësjellësit të qytetit të Tetovës nga Kodra e Diellit deri te rezervuari – faza e dytë, me vlerë prej 65.598.976 denarë.
Të dy projektet janë të financuara 100% nga buxheti i Qeverisë, ndërsa realizues i punimeve është kompania SHNPI PELLAGONIJA SHA – Gostivar.
“Këto investime janë pjesë e përpjekjeve tona të vazhdueshme për të siguruar shërbime themelore dhe të qëndrueshme për qytetarët tanë. Përmirësimi i sistemit të ujësjellësit nuk është vetëm çështje infrastrukture, por një domosdoshmëri për cilësinë e jetës në qytet,” – deklaroi Bilall Kasami, kryetar i Komunës së Tetovës.
“Sot shënuam fillimin e një projekti jetik për qytetin, ndërtimin e një sistemi modern të furnizimit me ujë në një nga lagjet më të mëdha të Tetovës. Ky investim kap vlerën mbi 15 milionë denarë, të siguruar plotësisht si grant nga Qeveria, dhe do të ndikojë drejtpërdrejt në përmirësimin e kushteve të jetesës për qindra familje”– theksoi Izet Mexhiti, zëvendëskryeministër i parë dhe ministër i Ambientit Jetësor dhe Planifikimit Hapësinor.
Punimet pritet të zhvillohen në përputhje me afatet ligjore dhe standardet teknike të parashikuara në kontrata. Komuna do të monitorojë nga afër zbatimin e projekteve për të siguruar transparencë dhe efikasitet në çdo fazë.
