Të paktën katër persona u vranë dhe 10 të tjerë u plagosën nga të shtënat me armë zjarri gjatë një takimi familjar në Stockton të Kalifornisë Veriore.
Heather Brent, një zëdhënëse e Zyrës së Sherifit të Qarkut San Joaquin, tha në një konferencë se të shtënat ndodhën rreth orës 6 pasdite sipas kohës së Paqësorit, në një sallë banketesh përgjatë bllokut 1900 të Avenysë Lucile. Ajo tha se viktimat varionin në moshë nga të mitur deri te të rritur.
Rrethanat që çuan në të shtënat ishin të paqarta dhe ende nuk ka persona të arrestuar, sipas policisë.
Zëvendëskryetari i bashkisë Stockton, Jason Lee, shkroi në një postim në rrjetet sociale se “të shtënat masive” ndodhën “në festën e ditëlindjes së një fëmije”, por policia nuk mundi të konfirmonte detajet e ngjarjes, duke e quajtur atë vetëm një “mbledhje familjare”.
“Një festë datëlindjeje nuk duhet të jetë kurrë një vend ku familjet kanë frikë për jetën e tyre”, shtoi Lee.
CBS News konfirmoi se spitali u vu në mbyllje të shtunën në mbrëmje pas të shtënave, në atë që ka të ngjarë të ishte protokoll për një incident me viktima masive, raporton KosovaPress.
Zyra e Guvernatorit të Kalifornisë Gavin Newsom, tha në një postim në rrjetet sociale se Newsom ishte informuar për të shtënat.
“Ne po i bëjmë thirrje kujtdo që ka informacione, pamje filmike ose që mund të ketë qenë dëshmitar i ndonjë pjese të këtij incidenti, të kontaktojë menjëherë Zyrën e Sherifit të Qarkut San Joaquin”, tha zyra e sherifit në një njoftim për shtyp.
