Sot shënohen 27 vjet nga rënia heroike e komandantit të Ushtrisë Çlirimtare të Kosovës, Ismet Jashari – Kumanova.
I lindur më 16 prill 1967 në Orizare të Kumanovës, Jashari që në rini u përfshi në veprimtari atdhetare, duke u bërë pjesë e brezit që besonte në alternativën e rezistencës së armatosur kundër pushtuesit. Ai ishte ndër nismëtarët e fondit “Vendlindja Thërret”, që u shndërrua në shtyllë të logjistikës dhe financimit të luftës së UÇK-së.
Pas epopesë së Prekazit më mars 1998, Jashari hyri në Kosovë bashkë me shumë figura të njohura të luftës çlirimtare, duke u vendosur në Likoc, bazën kryesore të UÇK-së.
Më 23 gusht 1998, në betejën e ashpër të Bajrakut të Luzhnicës, ai udhëhoqi rezistencën kundër forcave serbe. Pas luftimesh të pandalura, në mëngjesin e 25 gushtit, Jashari ra dëshmor së bashku me Nuhi Mazrekun e Habib Zogajn, duke hyrë përgjithmonë në altarin e lirisë.
Sot ai prehet në varrezat e dëshmorëve në Kleçkë, bashkë me 66 luftëtarë të tjerë të Brigadës 121 “Ismet Jashari – Kumanova”. Emri i tij mbeti frymëzim për mijëra luftëtarë e breza të tërë, ndërsa shtatorja e tij në Prizren kujton çdo ditë figurën e Komandant Kumanovës.
Ismet Jashari la pas bashkëshorten Habiben dhe vajzat Marigonën, Monikën, Donikën, Margaritën dhe Artanën.
