Shkollat fillore dhe të mesme nesër do të hapin dyert për t’ju rikthyer procesit mësimor pas thuajse tre muaj pushim për nxënësit. Sipas të dhënave të komunave tashmë të dorzuara në Ministrinë e Arsimit, janë 245 mijë nxënës që do mësojnë në arsimin fillor dhe të mesëm. Prej tyre, 17.250 fëmijë nisin klasën e parë ndërsa 17.230 vitin e parë në shkolla të mesme.
“Nga të dhënat që posedoj për momentin nuk ke ulje të numrit të nxënësve kundrejt vitit të kaluar. Të dhënat nuk janë përfundimtare duke marë parasysh se shkollat vazhdojnë të na dorëzojnë numra. Dua ta theksoj se mbetemi të përkushtuar për futur mësimdhënien në një turn të vetëm në shkollat ku është e mundur si dhe optimizimin e rrjetit shkollor, që nënkupton mbylljen e objekteve shkollore në zonat rurale ku numri i nxënësve është shumë i vogël”, tha Vesna Janevska, ministre e Arsimit.
Ministrja Janevska kujtoi se në vitin e ri shkollor për herë të parë do të angazhohen asistentë arsimor edhe për nxënësit e shkollave të mesme. Fillimisht, numri I tyre do të jetë 130. Janevska tha se nga mësimi nuk do të humbin as fëmijët që kanë probleme shëndetësore dhe kohë më të gjatë mungojnë nga shkolla.
“Përveç 1,346 asistentëve arsimorë në shkollat fillore, për herë të parë, nxënësit e shkollave të mesme me nevoja të veçanta arsimore do të marrin gjithashtu ndihmë arsimore, dhe ata do të ndihmohen nga 130 asistentë arsimorë. Për herë të parë, arsimi formal është futur edhe për fëmijët që i nënshtrohen trajtimit afatgjatë në spital, dhe ata nuk do të mungojnë më në mësim. Në varësi të gjendjes së tyre, ata do të jenë në gjendje të bashkohen me klasën e tyre në internet ose mësuesi do të punojë me ta individualisht”, shtoi Vesna Janevska, ministre e Arsimit.
Duke ju uruar fillim të mbarë punonjësve në arsim, Janevska kujto se do të realizohet rritja e pagave prej 7.5% në 10% në varësi të nivelit të inflacionit. Sipas dikasterit të arsimit, në vitin e ri shkollor, është siguruar mbështetje më e madhe për nxënësit e talentuar, pra mbulim i plotë i kostove të pjesëmarrjes në olimpiadat ndërkombëtare të shkencës. /Alsat.mk
